Në javën e 32 të kampionatit spanjoll në futboll, skuadra e Realit të Madridit mundi Getafen me rezultat 3:2, ndërsa mbrojtësi i Realit, Pepe, shënoi veprimin më bizarë të kësaj jave, ndoshta të muajit prill. Në minutën e 89 -të, qendërmbrojtësi i “mbretërve”, Pepe, në zonën e rrezikut, fillimisht e rrëzoi sulmuesin e Getafes, Francisko Kaskuera, e më pas filloi të shqelmojë. Pepe u ndëshkua me karton të kuq, ndërsa goditjen e Kaskueros nga pika e bardhë e ndali portieri Iker Casillas. Pas një veprimi të tillë tejet jo sportiv, qendrëmbrojtësi i Realit të Madridit, Pepe është në pritje të shqiptimit të dënimit, edhe pse gjatë ditës së sotshme kërkoi falje publike Kaskueros dhe familjes së tij. Ndryshe, Getafe dy herë ishte në avantazh , mirëpo Reali arrinte të barazojë rezultatin dhe pas humbjes së penaltisë nga mysafirët, dënimi erdhi përmes argjentinasit Higuanit, i cili siguroi pikë të vlevshme për madrilenët në garë për titullin e kampionit.