Sulmuesi brazilian në radhët e Volfsburgut, Edinaldo Batista Libano Grafite (30-vjeç), ka konfirmuar se të hënën do të nënshkruajë kontratë të re trevjeçare me skuadrën kampione të Gjermanisë.
“Gjithçka është e qartë. Të hënën do të nënshkruaj kontratë të re me Volfsburgun. Jam i lumtur që do të mbetem pjesë e kësaj skuadre”, ka theksuar Grafite. Në këtë mënyrë sulmuesi brazilian do të jetë i lidhur me Volfsburgun deri në verën e vitit 2011. Grafite e ndihmoi këtë skuadër për ta fituar titullin e parë të kampionit në Bundesligë, duke shënuar 28 gola. Ndërkohë, për edicionin e ri ai ka vendosur një tjetër synim: “Dua të shënoj së paku një gol më shumë se sa në edicionin e kaluar”, ka shtuar Grafite.