Ish-trajneri i Interit, Roberto Mançini është kandidati kryesor për postin e përzgjedhësit të Japonisë. Njëra nga skuadrat më të forta të Azisë, tashmë ka siguruar kualifikimin në Kampionatin botëror 2010, mirëpo është në kërkim të një trajneri me përvojë të madhe, në mënyrë që në Afrikën e Jugut të arrijë rezultate sa më të mira.
Pas pushimit njëvjeçar, duket se Mançini do të rikthehet në detyrë. Ai ende është në listën e pagave te Interi, me të cilin klub ka kontratë të vlefshme deri në vitin 2011. Për këtë arsye, Federata japoneze e futbollit po shqyrton mundësinë që Mançini të nënshkruajë kontratë vetëm për Botërorin 2010. Për momentin skuadrën japoneze e udhëheq, Takeshi Okada, por drejtuesit e federatës japoneze synojnë të angazhojnë një trajner me përvojë më të madhe.