Sulmuesi paraguaian, Roke Santa Kruz, i cili ditë më parë braktisi radhët e Blekburnit për të kaluar te Mançester Siti, nuk ka asgjë kundër nëse skuadra e tij e re do të përforcohet edhe me dy sulmuesit e spikatur, Karlos Tevez dhe Samuel Eto.
Roke Santa Kruz momentalisht është përforcimi më i shtrenjtë i Sitit, pasi për të janë paguar 18 milionë funte. Ndërkohë, drejtuesit e Sitit shpresojnë se për 25 milionë funte do të arrijnë të transferojnë Tevezin, kurse për një shifër dyfishë më të madhe edhe sulmuesin kamerunas, Eto. "Nuk e di se kush do të vijë, e kush jo në skuadër, por unë i gëzohem çdo ardhje të re, e cila do ta përforcojë klubin tim të ri. Fanella e klubit të madh sjell me vete sfidë dhe betejë për një vend titullari dhe kjo konkurrencë e bënë skuadrën më të fortë dhe më të suksesshme. Një e tillë i shtyn futbollistët për angazhim më të madh dhe për t'u dëshmuar sa më shumë", ka pohuar 27-vjeçari paraguaian, Santa Kruz, i cili ka nënshkruar kontratë katërvjeçare me klubin e Mançester Sitit.