Mbrojtësi i trofeut të Ligës së Kampionëve, Mançester Junajted do të luajë në çerekfinale kundër skuadrës portugeze, Porto, ndërkohë që sfida më interesante e kësaj faze do të jetë pa dyshim përballja angleze, Liverpul - Çelzi. Në dy sfidat e tjera çerekfinale do të takohen Vilareal-Arsenal dhe Barcelona - Bajern.
Ndeshjet e para do të zhvillohen më 7 e 8 prill, kurse ato të kthimit më 14 e 15 prill. Në gjysmëfinalen e parë do të takohen fituesi i ndeshjes Mançester Junajted - Porto me fituesin e ndeshjes Vilareal - Arsenal, kurse në gjysmëfinalen e dytë fituesi i ndeshjes Barcelona - Bajern me fituesin e ndeshjes Liverpul - Çelzi. Finalja e Ligës së Kampionëve zhvillohet më 27 maj në Romë.