Kampioni në fuqi i Serie A, Interi, ka treguar një paraqitje jo aq bindëse për të barazuar 1-1 në Giuseppe Meazza përballë ekipit të porsa-promovuar në ligën e parë italiane, Bari.

Nerazurët kishin problem për të thyer mbrojtjen e Barit, edhe pse patën kontrollin e topin në pjesën më të madhe të kohës. Pas pjesës së parë pa gola, rezultati u hap vetëm në fillim të pjesës së dytë nga penaltia e dyshimtë e fituar nga Diego Milito dhe e shndërruar në gol nga Samuel Eto’o (56’).

Vendasit do të mund ta kishin bërë 2-0 disa minuta më pas, kur Milito i dha një top të përkryer Eto’o, por kamerunasi dërgoi topin jashtë portës, edhe pse ishte i vetmuar me portierin.

Mysafirët shfrytëzuan ‘lodhjen’ e vendasve dhe shënuan me anë të një kundërsulmi, kur Vitali Kutuzov (73’) kontrolloi një pasim të Antonio Langella dhe dërgoi topin në rrjetën e Julio Cesar.

Bari madje për pak nuk siguroi një fitore historike, pasi një gabim i Thiago Motta i dha shansin e artë Emanuel Rivas, i cili e dërgoi topin vetëm mbi gol.