Drejtuesit e skuadrës spanjolle, Hetafe, dëshirojnë të rikthejnë në krye të skuadrës strategun gjermane, Bernd Shuster. Para se të kalonte në Real Madrid, Shusteri ka drejtuar me mjaft sukses Hetafen nga viti 2005 deri në vitin 2007.
Në radhët e "klubit mbretëror" ai qëndroi 16 muaj, kurse momentalish është i papunë, ngase në fillim të këtij viti u shkarkua nga detyra e trajnerit te Reali i Madridit. "Për Shusterin dyert e klubit tonë gjithmonë janë të hapura. Shuster është një romantik i futbollit, për të paraja nuk është me rëndësi, por sfidat sportive", ka pohuar presidenti i Hetafes, Angel Torres. Trajneri aktual i Hetafes, Viktor Munoz është ballafaqur me shkarkim nga detyra, ngase klubi gjendet në pozitën e 17-të në Primera Divisin, me vetëm dy pikë më shumë nga skuadrat që bien nga liga.