Injeksion për kancerin e testiseve

Shkencëtarët besojnë se forma më e shpeshtë e kancerit të testisit mund të mjekohet me një injeksion të vetëm.
40% deri 45% e rasteve me kancer të testiseve janë seminoma në stadin e hershëm, gjendje e cila mund të mjekohet me anë të rrezatimit. Mirëpo, tani shkencëtarët shpresojnë se një injeksion i vetëm që përmban barin karboplatin do ta zëvendësojë radioterapinë dhe do t’i zvogëlojë rreziqet të cilat i bart rrezatimi.

Në bazë të analizave të cilat janë bërë në Universitetin e Southamptonit në Angli, meshkujt të cilët kanë marrë injeksion me karboplatin kanë pasur pak efekte anësore dhe shumë shpejt i janë kthyer aktivitetit të zakonshëm.

Meshkujt të cilët kanë marrë karboplatin kanë qenë më pak të rrezikuar për ta zhvilluar kancerin edhe në testisin tjetër.

Te 5% e meshkujve të cilët kanë marrë karboplatin, sëmundja është kthyer pas tre vitesh, mirëpo asnjëri prej tyre nuk ka vdekur pas përsëritjes së mjekimit.