Presidenti i UEFA-s, Mishel Platini, në një bisedë për të përditshmen sportive franceze "L'Equipe" sërish ka folur për transferet e futbollistëve me shifra marramendëse. Platini menjëherë pas marrjes së detyrës në krye të UEFA-s kishte paralajmëruar se do të luftojë kundër transfereve të tilla dhe se qëllimi i tij është të baraspeshojë Evropën e futbollit.
Platini ishte kundërshtuesi më i madh i ndarjes në klube të mëdha dhe të vogla, mirëpo e tëra çfarë mundi të bëjë ishte vetëm të vëzhgojë se si presidenti i ri i Realit, Florentino Perez, solli për rreth 200 milionë euro yjet e futbollit si Kristiano ROnaldo, Kaka, Karim Benzema dhe Raul Albiola. "Çfarë kam mundur të bëjë? Nuk mund t'i frenoj klubet e forta që të bëjnë transfere të tilla. Ende nuk mund ta bëjë një gjë të tillë, por jam i sigurt se pas dy apo tre vitesh nuk do të ketë transferime të tilla, ose jo së paku me këtë ritëm siç është tash. Për mua transferimet e tilla nuk janë në frymën e 'fair-play'-it", ka nënvizuar Platini.