Forcat indiane të sigurisë së shpejti do të munden që në demonstrues të hedhin granata të mbushura me pluhur të specave të djegës në vend se t’i gjuajnë ata me gaz lotsjellës apo me ndonjë shpërthyes tjetër, ka paralajmëruar të premten një zyrtar qeveritar i vendit.

"Pluhuri i specit të djegës në granata përkohësisht do të paaftësojë njerëzit, por nuk do t’i mbys", ka thënë për agjencinë e lajmeve France Press Suranjan Pal nga ministria indiane e mbrojtjes.

Ekspertët ushtarakë kanë precizuar se specat e vegjël të djegës kanë prejardhje nga shteti indian Nagaland dhe se janë 1.000 herë më të djegës sesa specat e zakonshëm të djegës të cilët përdoren për përgatitjen e ushqimeve.