Mbretëresha britanike, Elizabeth II, ka gjetur një mënyrë të re për të fituar para. Ajo ia ka dhënë me qira një pjesë të madhe të pyllit në Swinley, jo larg Pallatit Windsor, kompanisë filmike Warner Bros, e cila në atë zonë do ta xhirojë filmin e ri për magjistarin e vogël Harry Potter.

Gjatë dy muajve të ardhshëm, të gjitha yjet e filmit për djaloshin magjistar përfshirë këtu edhe vetë Potterin, respektivisht aktorin Daniel Radcliffe, do të marrin pjesë në xhirimin e filmit, që është vazhdim i filmave të mëparshëm të realizuar në bazë të librave të autores JK Rowling.

Mbretëresha, siç bëjnë të ditur mediat botërore, është shprehur e entuziazmuar me këtë veprim, pasi është adhuruese e Harry Potterit. Shuma e kontratës mbahet në fshehtësi, mirëpo tabloidi britanik Sun thekson se bëhet fjalë për një shumë të majme parash.