Dyshja sulmuese Nicolas Anelka dhe Didier Drogba kanë ndihmuar njëri-tjetrin të shënojë secili nga një gol, për t’i dhënë fitoren 2-0 Chelseat në ndeshjen përballë Fulhamit në Craven Cottage.
Sulmuesi i Bregut të Fildishtë shënoi golin e tretë në tre ndeshje pas një asistimi të shkëlqyeshëm të Anelka në fund të pjesës së parë (39’), ndërsa në pjesë të dytë Drogba ia ktheu borxhin francezit, duke asistuar në golin e tij të shënuar 14 minuta para fundit të ndeshjes (76’).

Fitorja është e treta në tre ndeshjet e para të sezonit për Chelsean, që ngjitet në krye të tabelës me pikë të barabarta me Tottenhamin.

Në ndeshjen tjetër të sotme, Burnley, që gjatë mesjavës bëri befasinë duke mposhtur Manchester United, ka shënuar fitore minimale ndaj Evertonit, falë golit Wade Elliot në minutën e 36-të.

Mysafirët patën një rast shënimi në minutën e 76-të të ndeshjes, por Luis Saha nuk ishte i saktë nga pika e bardhë.