Rikthimi i Ervin Skelës ka sjellë qetësi tek Energie Kotbus.

Fantazisti shqiptar është lojtari kyç i skuadrës së drejtuar nga Bojan Prasnikar në luftën për të mbijetuar në elitën e futbollit gjerman.

32-vjeçari ka kaluar virozën gripale dhe të shtunën do të zbresë në fushë, në takimin me Këlnin. Një lajm mjaft i mirë ky për trajnerin e Kotbus.

“Vetëm pas mungesës së tij (Skelës) në ndeshjen me Hamburgun, e kuptuam se sa i rëndësishëm është ky lojtar për skuadrën”, deklaroi Prasnikar. “Është njësoj sikur të kthehesh në shtëpi dhe gruaja mos të ta ketë përgatitur darkën si zakonisht. Vetëm në ato momente e vlerëson punën e saj”, ishte krahasimi i drejtuesit të stolit. Vetëm pak orë përpara ndeshjes, Skela rifilloi stërvitjet me pjesën tjetër të skuadrës dhe sipas të gjitha gjasave, do të jetë në formacionin titullar.

“Besojmë se me klasin e tij do të jetë një lojtar vendimtar kundër Këlnit. Shpresoj vetëm që prej sëmundjes të mos ketë humbur fuqitë”, tha Prasnikar.