Krerët e Shtetit të Shqipërisë, presidenti Bamir Topi, kryeministri Sali Berisha dhe kryeparlamentarja Jozefina Topalli kanë uruar të shtunën shqiptarët për dy festat e mëdha të vendit, Ditën e Pavarësisë dhe Ditën e Çlirimit.

Ata vendosën kurora me lule, si çdo vit në Varrezat e Dëshmorëve si dhe tek monumenti Nënë Shqipëri, ndërsa më vonë mësohet se do të udhëtojnë drejt Vlorës për të kremtuar atje Ditën e Pavarësisë.

Presidenti Topi gjatë ceremonisë tek Dëshmorët u shpreh se "i uroj shqiptarëve për këtë ditë të madhe, në të cilën rikthejmë në memorie veprën e lavdishme të atdhetarëve që luftuan për mbijetesën e popullit shqiptar".

Ndërsa kryeministri Berisha e vlerësoi 28 Nëntorin, si ditëlindjen e Kombit. "Sot ne kremtojmë ditëlindjen e kombit, kremtojmë heroizmin, luftën, përpjekjen e shqiptarëve në Luftën e Dytë Botërore. Jemi më krenarë për historinë tonë, flamurin me të cilin luftuan qindra e mijëra luftëtarë shqiptarë, flamurin për të cilin ranë mijëra djem e vajza", u shpreh Berisha. /shekulli/